بعد العداء الذي اعلن من بعض الجهات والمحامين الصيادين الاخطاء تطوعت عدد من الصحفيات تحمل مسؤلية الدفاع عن الفنانة يسرا والفنانة الهام شاهين من الغضبة الغير مبررة حفاظا علي اخلاقيات المهنة الصحفية ووئد الفتنة التي يحدثها البعض بين الفنانين والصحافة وتعددت المقالات وقد اخترنا من هذه المقالات مقالة الصحفية الشابة  ريهام المصري التي كتبت تقول : 

١-أنا صحفية وبعلن تضامني مع #يسرا و #إلهام_شاهين .. وإللي بيحصل ده أكبر مهزلة حصلت في تاريخ #الصحافة_المصرية..
٢-بشهادة الصحفيين ان محصلش اعتداء على الصحفية من أي نوع .. وانه تم اخراجها من قبل الأمن لعدم رغبتهم في وجودها ودا حقهم .. 
٣-البنت تجاوزت أخلاقيات المهنة ودخلت لحد سرادق العزاء ودا قانونا انتهاك خصوصية..
٤-كل ما ذكر في بلاغ المحامي العظيم عارف ان ملوش سند قانوني وأن الحق معاهم .. 
-كفاية عك بوظتوا سمعتنا وسمعة المهنة ومصَدرنا للفنانين أننا شوية صحفيين بلطجية .. 
-لو البنت ليها حق كنا اتكلمنا فيه لكن ترموا بلاكم عالناس بالباطل .. أنتم أدنى درجات الخوف من ربنا مش موجوده في قلوبكم .. 
-عيب ولما نقول أن تجاوزاتكم الصحفية من أجل الشهرة والترافيك بتضرنا إحنا .. ترجعوا تصدرونا إحنا إللي بتوع مشاكل .. نحترمكم إزاي وأنتم بتتنافوا مع أدنى درجات الأخلاق المهنى ..
#نجستوا_بلاط_صاحبة_الجلالة
#وقائع_حقيقية_عن_يسرا 
ويسأل الأصدقاء #الصحفيين المذكور أسمائهم ..

-#يسرا عرفتها نهاية ٢٠١٥ ولحد شهر ٦ ٢٠١٦ كانت معرفتنا سطحية جدا مقتصرة على الشغل فقط .. 
-جيت في مرة كتبت خبر عن مسلسل (فوق مستوى الشبهات) استنادا لمصدر داخل المسلسل .. لاقيتها بتكلمني بعتاب راقي وقالتلي هل أنا فيه مرة مردتش عليكي اللي قالك الكلام ده مش حقيقي .. الخبر اتشال ..
-التقيت بيها بعدها في كواليس نفس المسلسل نسجل لإي تي بالعربي.. وكانت برضه أول معرفة ليا بأستاذي وأبويا #جمال_العدل .. وقف عرفها بيها بتواضع شديد منه .. وكانت لسه زعلانه من الخبر .. وقتها صديقي العزيز #أشرف_شرف كان جاي يسجل معاها لقاء عن الراحل #صالح_سليم .. وأشرف أستأذني يسجل قبلي علشان يلحق باقي وقته .. ورحبت طبعا لاننا أصدقاء وفِي الاخر كلنا هنسجل .. رغم زعلها مني وقتها اتصرفت تصرف علمني يعني ايه احترام الزعل .. لما أشرف قالها هنسجل .. قالتله لا يا أشرف سامحيني هي مستنياني من بدري هسجل معاها الأول .. 
#ملحوظة صديقي الغالي أشرف صديق يسرا قبلي بكتير ورغم كده التزمت الحياد في التصوير .. 
وبود بعد ما خلصنا تقبلت اعتذاري وانتهى الزعل..
-التقيت بيها تاني وقت المسلسل وانا بعمل حوار لمجلة ٧ أيام .. الحوار بدأ ٩ مساءا وفِي النص اضطرت تقوم للتصوير من ١١.٣٠ لحد ٥ فجرا وانا منتظراها علشان نكمل .. جت وكملنا الحوار وبعدها أصرت ان يطلعلي عربية مخصوص من اللوكيشن توصلني لحد البيت نظرا لان التصوير كان في شبرامنت منطقة مش أهله بالسكان بشكل كبير.. 
-مر الوقت .. وبدأ يبان عليا الاكتئاب بعد وفاة والدي وبدأ التظاهر بتجاوز أزمة الوفاة يتلاشى ويظهر مكانه ضعف الفقد للسند .. في اللحظة دي كنت بكلمها في شغل ولاحظت من نبرة صوتي ان فيه حاجة مزعلاني .. سألت في المكالمة وقولتلها مفيش حاجة..
-بعد المكالمة تبادلنا عدد من الرسايل وبعتتلي رسالة وقتها بنصيحة متمسكة بيها لحد النهاردة (متبينيش ضعفك لحد علشان ميستغلش ده قوليلي أنا عمري ما هخذلك) 
-بالفعل رميت حمل ضعفي كله عليها ومخذلتنيش.. وفِي السنة دي كانت ما بين تصوير الحساب يجمع وبين لبنان لتصوير بروجيكت ران واي .. وفِي عز ضغط الشغل والإرهاق .. كانت دائمة السمع ليا وتنصحني وفضلت معايا سنة كاملة لحد ما تجاوزت الأزمة ورجعت وقفت على رجلي تاني وتقبلت فكرة ان الموت علينا حق وان بابا ان رحل عني لكن هو في كل حته من وجداني .. ولا مرة فكرت تسأل هل البنت تستاهل أقف جنبها؟! هل تستحق أثق فيها ؟! عملت ده بفطرة انسانية بحته ..
-في نفس السنة تعبت وأجريت عملية ووقتها زميلي #مصطفى_عمار قالي روحي لدكتور #ماجد_بهجت .. وبالصدفة ان دكتور ماجد طلع صديق يسرا ولما عرفت أصرت انها لازم تكلمه ووصت عليا .. ويوم العملية بقيت تبعتلي أدعية وتقولي أقول ايه قبل العملية بحنان أمومة فطرية بعيد عن مظهر النجمة ومظهر الشهرة .. 
-لما مرة سألتها ليه عمرك ما فكرتي تردي على أذى حد ليكي .. قالتلي (أنا هيبقى انتقامي أحسن من ربي أنا بقول حسبي الله ونعم الوكيل وربنا دايما بينصرني.. وانتي لازم تعملي ده احتسبي أي حاجة عند ربنا وهتشوفي ان كلامي صح) .. 
-لما كان حد من الأصدقاء يكتب عنها مقال بحب ويقولي ابعتلها ده .. كانت تقولي ابعتيلي رقمه او رقمها لازم أشكره بنفسي .. وصديقتي #سارة_علام تشهد وصديقي #محمد_الشرقاوي يشهد ..
-دي الانسانة اللي بيتجرح فيها النهاردة وبتتهم ظلم انها اعتدت على شخص صحفية .. وهي عمرها ما آذت حد .. في ظرف انساني ربنا وحده أعلم بيها فيه .. ودي الشخصية اللي البعض هاجمها بدون ما يعرفها ويعرف أن #يسرا حققت معادلة صعبة انها تبقى نجمة شهرتها من المحيط للخليج وأبقت على إنسانيتها والغرور يأس يدخلها منين .. 
حكيت حاجات مكنتش حابة أحكيها وكنت عايزة احتفظ بيها للحظة مستقبلية احكي فيها عنها ..
إللي عارفني كويس عارف اني عمري ما كان طبعي النفاق ولا التملق وعارف اني خوضت معارك كتير مكنتش تخصني لكن تخص حقوق ناس لازم ترجع .. وعمري ما سمعت لكلمة (ملكيش دعوة مادام أنتي بره الموضوع) وكنت بقول الحق أحق ان يتبع.. 
لا هو بطولة مني ولا إدعاء شرف وفضيلة .. أنا زي زيكم بخطئ وأصيب .. لكن حق ربنا لو متقالش بيفضل زي العلقم محشور في الزور .. 
#أخيرا أنا لو مدافعتش عنها وعن المقربين مني ولو تخاذلت عن حق ليكم في يوم من الأيام .. أنا إللي بقولكم محدش يثق فيا ولا يأمني في يوم من الأيام .. 
ملحوظة :- البعض منكم عنده ظن اني بايته في حضنها تقريبا .. أنا عدد المرات اللي التقيت فيها بيسرا تتعدد على الصوابع وكانت لشغل ولَم تتجاوز مدة الشغل .. وكلامنا الشخصي كله هاتف فقط .. لم يجمعني بيها قعدة بعيدة عن العمل علشان محدش يتصور اني بقول ده بدافع ان مساحة الود متجاوزة لحد التداخل المنزلي.. 
في النهاية : الأصدقاء في الدستور ليكم كل المحبة والتقدير .. دكتور #محمد_الباز أنت أبويا ووقفتك معايا وقت أبويا وبعدها مش هنسهالك .. أنا لو مساندش حق ربنا النهاردة .. أوعى تثق فيا تاني .. يوم ما الدنيا تيجي عليك بالباطل هطلع أحط رقبتي على سيف واجيبلك حقك .. ومفيش في قلبي عداوة لأي شخص فيكم ..