كتب : احمد حسني 

فاكرين الست دى؟
قطع لساني ورقبتي وأيدي ورجلي ان كنت هتكلم عنها ربع كلمه مش كويسة.. دى ست فاضلة صاحبة رسالة في بلد تبخرت منه ملامح الفضيلة واصول التربية الحسنة.
دى اسمها فايزة واصف.. زمان أيام الثمانينات كانت بتقدم برنامج جميل جدا كل يوم جمعه اسمه "حياتي".. برنامج اجتماعي يهتم بالمشاكل اللى بتواجه الاسرة المصرية.. حلقة تمثيليه كامله تجسد المشكلة.. بعدها يبدأ الضيف في تحليل الموقف وابداء الرأي والنصيحة.
الضيف دائما بيكون من أهل الاختصاص.. ودائما من اهل الشعر الأبيض اللى عركوا الحياة واختبروا في أكثر من موقف وخاضوا تجارب فعلية لحد ما تكونت لديهم حصيلة خبرات حياتية تؤهلهم لإسداء النصيحة.
فايزة واصف كانت ست محتشمة الشكل والمضمون.. لا ماكياج ولا عريان ولا مجوهرات مستفزه.. لا كلام شاذ ولا اراء منفره.. لا شطحات دينية ولا مساس بثوابت المجتمع والأسرة.. لا خلط بين المفاهيم ولا سم مدسوس في معسول الكلمات.. لا عنصريه ولا تحزب في كلامها.. النصيحة الهادئة من أهل العلم والاختصاص مع طرح اكتر من حل وبديل واقعي مناسب لصاحب المشكلة.. برنامج هادئ ومناسب لكل افراد الأسرة.. رغم انى كنت بتخنق منه وانا صغير بسبب كم المآسي المهول اللى بيعرضه كل جمعه وأساسا يوم الجمعة مش ناقص.. ما بين صراخ امى طول النهار وعلقة ابويا بتاعة بعد المغرب علشان نكوى هدوم المدرسة وبين الهم الأكبر ان المدرسة بكره الصبح والويك اند اللى خلص.. الا ان برنامج حياتي كان من ثوابت يوم الجمعة.. زيه زى عالم الحيوان وسينما الأطفال وحديث الشيخ الشعراوي كده.
بتحكي السيدة الفاضلة فايزة واصف عن جوابات الناس انها كانت بتجيلها في "اشوله" جمع شوال يعنى.. ولكنها كانت بتختار المشكلة الأكثر شيوعا وانتشارا مش الأكثر فرقعةً.. وبتحكي كمان انها كانت بتقرأ كل الرسائل.. لو افترضنا ان بيجيلها 1000 رسالة أسبوعيا "وده رقم قليل جدا" فهذا يعنى انها كانت بتقرأ 1000 مشكلة "مع فريق الاعداد طبعا" علشان تختار منهم واحده بس تعرضها للناس في غير ابتذال ولا سقوط.
مفاجأة اكتشفتها اسمها قناة ماسبيرو زمان.. مش قادر اتخيل ان التليفزيون بتاعنا كان بيعمل حلقات يستضيف فيها العقاد وطه حسين ويوسف ادريس.. اتصدمت لما شفت الفرنساوي اللبلب بتاع فاتن حمامه وللا ثقافة "اى وربنا ثقافة" سمير صبري الفوق مذهلة.. لساني اتعقد من المفاجأة وانا شايف الشيخ الباقوري والشيخ الشعراوي والشيخ الغزالي في معارك فكرية رهيبة.. طب عليا النعمه شفت حلقه مستضيفين فيها يورى جاجارين.. اول رائد فضاء روسى يطلع بره الكوكب.. حلقات برنامج حياتي والست فايزة واصف رجعوني 30 سنه لوراء.. علشان أقول للزمان ارجع يا زمان.
ان كنت بجح يعنى وقلبك قاعد.. قارن بين فايزة واصف وبين مهابيل التوك شو بتوع النهارده.. شوف كده تقدر تخلي ابنك وللا بنتك يتفرجوا على حلقة من برنامج حياتي وللا على حلقات نفسنه ورضوى الشربيني وباقي شلة المطلقات اللى فشلوا يعملوا بيوت فبدل ما يصلحوا حياتهم قرروا يخلوا الباقي زيهم.
اما ان كنت انسان طبيعي.. يبقى تترحم معايا على أيام كانت البلد فيها محترمة مهذبة تصلح للمعيشة وتربية العيال.
فايزة واصف زوجه وام وجده.. امرأه عامله وموظفه.. ست صاحبة رساله وهدف فى الحياه.. دى لو امى.. وربنا اعملها تمثال فى ميدان التحرير واقف جمبه احرسه كل يوم.. لو سألونى عن رموز الوطن.. اقولهم سميرة موسى.. ام كلثوم.. فايزه واصف.. ست تصلح تكون قدوه.
فايزه واصف كانت سترونج وومان.. بيرفكت وومن.. جود وومان.. وومان زى ما تحب انها تكون امك او مراتك او بنتك.. وومان عارفه عظمتها وقيمتها كوومان.. وعارفه يعنى ايه مان برضه.. خدت كل حقوقها كوومان.. واعطت المان كل حقوقه.. علشان كده عاشت حياه فيرى هابى ومستقره.
فايزه واصف محدش فاكرها ولا بيتعلم منها.. مش بتطلع فى اى برنامج لانها مش بتجيب اعلانات ولا بتعرف تعرى حته من الفخد وحتتين من الصدر.. فايزه واصف كبرت وعجزت وهتموت - زينا كلنا - ومحدش هيفتكرها ولا يعتبرها رمز من رموز البلد..
عارفين ليه؟
لانها انسانه نظيفه.