منظر مجهول منشور علي الفيس بوك ليس منسوبا لاحد احببت ان انشره هنا

بعيدا عن كل حاجة بس الموظف اللي سرب صورة الإفراج الجمركي بتاعت عربية ياسمين صبري لازم يتحاسب 
يعني ايه إنسان لمجرد إنه مشهور يصحي من النوم يلاقي عنوانه بالكامل واسمه بالكامل وتفاصيل مادية دقيقة منشورة كده مستباحة من موظف المفروض إنه مؤتمن ؟ 
صحيح محدش يقدر يهوب جنبها كده كده 
بس ليه الخصوصية تنتهك سواء الشخص قوي أو لاء
في حد كان بيحكيلي مشكله ليه مع خطيبته إنه بيشك فيها وكان بيشتغل في بنك، فبقوله يمكن بيتهيألك قالي لاء دي كانت مع صاحبتها في اليوم ده وصاحبتها سحبت فلوس من ماكنه في الشارع الفلاني بان عندي !! يعني كانوا هناك !
أنت متخيل إن موظف البنك يقدر يعرف تحركاتك؟ لو مش أمين علي معلوماتك؟
بتاع الدليفري انطرد من مطعم كان شغال فيه وفضل يطارد واحده صاحبتي برقم التليفون اللي عرفه بحكم شغله شهور ! وأكيد معاه ليسته عناوين وأرقام يقرر يسرق مين ويطارد مين عشان حلوه 

موظف الشهر العقاري اللي خلص لقريبتي بيع أرض جابلها عريس متعرفوش اتصل بيها فجأة عشان الراجل  قاله دي عندها أملاك وهتساعدك خد متتكسفش!! 

ده الناس العادية خالص اللي معملتش جريمة وعايشة يومها عادي 
نيجي بقي للمجرمين .. بيلفت نظري في صفحة الحوادث دايما أو في أخبار الجرايم نشر تفاصيل كامله عن عنوان وحياة المتهم وهو لسه متهم ؟ طب افرض طلع براءه؟ طب افرض طلع متهم وقضي مدته وطلع مواطن صالح عايز يتوب ويعيش في حاله .. ازاي مسموح بنشر عنوانه  وتفاصيل حياته كلها عالمشاع؟ خصوصا لو متهمات بنات ؟ هل حجم الجريمة اللي عملوها مساوي لحجم الخطر  اللي هيتعرضوله طول حياتهم ؟ 
أنا فاهمة إن أحيانا لو المجرد نصاب خطير أو شيء لازم نشر علاماته المميزة عشان لو في ضحايا زيادة شهاداتهم هتفيد في الاستدلال عليه 
لكن مش منطقي ولا إنساني إن بيانات كل الناس تبقي معرضة للنشر  خصوصا إن الانترنت غير الجرايد .. الانترنت الحاجات بتفضل للأبد 
اعتقد لازم قوانين جديدة تناسب  طبيعة العصر بشأن خصوصية الحياة الشخصية وميثاق الشرف الصحفي وقواعد النشر فيما يتعلق بمعلومات الناس الشخصية سواء أفراد عاديين أو فنانين أو مجرمين حتي 

انتهاك بيانات ياسمين صبري علامة علي هتك بياناتنا كلنا وناقوس خطر فعلا 
إلا لو كانت هي اللي مسرباها كنوع من التباهي زي أغلب الفنانين علي مر الزمان وفي كل العالم ما بيسربوا معلومه عن نفسهم أو إشاعة حتي عشان يسيطروا عالأضواء